…..Gabaarraydii naaxdiyo, Gofannihii ku cuni jiray, Mar haddii lagaa guray, Ha gaagixin, ha-gamashiyin, Kaan gabin dadkiisiyo, Gaajada ka bi’iyiyo, Webi aan gudhayn noqo….
Hargeysa (Hubaal)- Akhyaarta Hubaal Media Ku Xidhan waxa aanu halkan idinku soo gudninaynaa sidii aad horeba uga barateen Muuqaalladdii Video-ga ahaa ee aanu toddobaadkii hal mar ku soo qaadan jirnay raad raaca taariikhda, isla markaana aanu dib idiinku xusuusinayno Mahadhooyinkii ay bulshadeenu u soo martay ka midho dhalinta himilladii aynu ku xoraynay dalkeena.
Toddobaadkii hore waxaanu idiin so baahinay khudbadii uu Madaxweynihi u horeeyey ka jeediyey shirweynihi beelaha Somaliland ee ay madax banaannideeda dib ugula soo noqotay ee ka dhacay magaalada Burco ee xarunta gobolka Togdheer sanadkii 1991kii, Maantanna waxaanu halkan idiinku soo bandhignaynaa Maanso qiimo badan oo intii shirweynuhu socday uu Madasha ka tiriyey Alla ha u naxariistee Abwaankii la hollin waayay ee Ibrahaim Sheekh Saleebaan (Ibraahim-gadhle), maansadan oo uu kula hadlayo Dhulka iyo hanashada aynu dib u soohelnay calankeenii, sidoo kalena ay u god galeen mujaahidiin ma dhaafaan ahaa oo u hoyday ka midho dhalinta halganka.
Maansadan oo aanu ugu magic darnay [Garo adiga inuu yahay] oo uu abwaanku kula hadlayo dhulka waxa ereyadeeda kamid ah:
Kii shalay Gumaysigu,
gar-darrada ku haystee
Guubaabo dheer iyo
Gacan lagu xoreeyee
Markii dhiig ku gobo’ yidhi,
Isticmaar ka guuree
Caawana gobta ahoow.
Sebenkii guhaadiyo,
gefka aan ku noolayn
Gantaalaha shisheeyaha
marka lagugu soo gano
Ee geesigaagiyo,
bannada lagaa dilo
Waadigii gil-gilan jiree
Gar-darrada nacaayee
Mar haddaan ku guud sudhay
Calan aan gaboobayn
Aan Weliba gaadh iyo
Kuu sameeyey gaadiid
Ha gariirine noqo
Mid aan gibisha naga ridin.
Gabaarraydii naaxdiyo
Gofannihii ku cuni jiray
Mar haddii lagaa guray
God-lataye dhulkaygoow
Ha gaagixin, ha-gamashiyin
Kaan gabin dadkiisiyo
Gaajada ka bi’iyiyo
Webi aan gudhayn noqo.
Geediga labaad iyo
Maansadaan u galayaa
Waa gar-sheeggadkaygiyo
Calankay u gaar tahay.
Calanyow gar-goorkiyo
Geedaha la midabee
Dhulka geesta uga egi
Gobolna yahay casaankee
Magic guulle lagu qoray
Guudkaaga dhiiggaa
Waxa lagu galbinayaa
Xinjir gubati laga qubay.
Gudbiyey oo aan dhaafee
Kuwa galabta mootanee
Geeriyooday awgaa
Tiro laguma garan karo
Aanse gibil ka sheegee,
Shiine yaa gondaa iyo
Garka iyo wadnaa jaray
Inay gaadmo hoosiyo
Isticmaar geddii tahay
Gunno qaato lagu diray
Gebi waan ogsoonnahay.
Lixle goobtii lagu dilay
Gaar bay u qoran tahay.
Koosaar lama gunaannadin
Iilkiyo god lama dhigin
Hayeeshee gabraartiyo
Gallatari hiilkeed
Kuwii weerar gawracay
Kood-buurna ila garo
Gulufkiyo colaadaha
Markay gebo-gabaha tahay
Gulufkiisii fiicnaa
Gacma dheere iyo dhagax
Kii gudihii siiyoow
Godobtaadu weynaa
Waxa gebi ahaanteed
Lala guud madow yahay
Geeridii Maxamed Cali
Godka lagu janneegii
Gudan jiray xilkiisii
Geesigii Saleebaan
Laga soo garoocee
Gabashada aqoon jirin
Garoo Aadan weeyee
Maalintii gammuunkiyo
Lala helay gantaalaha
Ilmadaydii gabax tidhi
Godantay biyeyn layd.
Gobtaa ay gumaadeen
Gaashaankii dirirtay
La galeen xabaashoo
Gobannimona may maqal
Ciil baa ku gaaxdee
Inaan goolkii dhalinoo
La gudboonay duniddoo
Geyi madax bannaan nahay
Adigaa warka u geyn
Guullana u weydii
Naxariis aan gudhin iyo
Garabkii rasuulkii
Guryo inay ku yeeshaan.
Kuwan geesahaygiyo
Goonyaha ka muuqdaa
Waa gurboodkii soo hadhay
Dumarkii goblamay iyo
Gobol baa agooma ah
Kii gargaari laayee
Gaajada ka bi’in lahaa
Garo adiga inuu yahay.
Kuman baa gacmaa iyo
Kuman baa gurguurtoo’
La gammuuray lugahee
Oo gaban-gaabshanaayee
Gacal lagama maarmee
Kii garabka qaban lahaa
Garo adiga inuu yahay
