Hargeysa (Hubaal)-Akhyaarta qiimaha badan eek u xidhan wargeyska HUBAAL Waxa aanu maanta halkan idiinku soo gudbinaynaa Maanso ka turjumaysa wacyiga dhabta ah iyo duruufaha dhaqan-dhaqaale, Nabad-gelyo iyo bulsho ee waqti xaadirkan ka jira dunida dacalladeeda.
Maansadan oo Abwaan Siciid Saalax Axmed Curiyey Muddo haatan laga joogo 37 Sanno [1978], waxa ay ku sallaysan tahay ama la odhan karo xaalad xilligaas la dhaadanaa jiritaankeeda balse immika ku gedaaman guud ahaan dunida.
Abwaan Siciid Saalax oo xilligii uu maansadan tiriyey gadh wadeen ka ahaa kooxdii IFTIN la odhan jiray ee fanaanniinta wasaaradda waxbarashada dawladdii kacaanka, kuwaas oo markii dembe ku luuqeeyey midhaha maansadan oo qaab heeseed loo qaaday, waxa laxanka saaray fannaanka foollaadka u ahaa kooxdaas IFTIN ee Seyid Cismaan Cabdi oo Seyid-khaliifa loo yaqaan.
Midhaha Maansadan oo Abwaan Siciid Saalax uu hal-ku-dheggeeda ugu wanqalay ‘Halis weeye, Halis weeye’ waxa ay ku bilaabmaysaa sidan:
Hareeraa aduunka,
Dab baa ka holcaaya
Hub baa ka qarxaaya
Hed baa ku baxaysa
Kuwaa herdamaya
Habeen iyo maalin
Kuwaa biyo hoostood
Haraati is yeela
Kuwa isku hiifa
Siyaasad hagoogan,
Kuwaa hardafaaya
Kuwaa halgamaaya
Kuwaa holinaaya
Kuwaa hadimaya
Kuwaa haqab beela
Kuwaa hunga taagan
Haybtiisaba Aadmi
Dadnima ka huleelye
Hagardaamo adduunka
Dad maxaa kala haysta
*******
Hareera Adduunka
Hormuud talinaaya
Hagaas daba jooga
Aqoonta Habowday
Hub geeri samaysa
Hadmaa laga waayi?
Haddmuu sacu dhiiqay
Hadhuub caana dhiiga
Sabuulka hadhuudhka
Rasaas laga hoobshey?
Kuwa cudur heeray
Hamuun iyo qaajo
Aqoon darro haysa
Kuwa hagranaaya
Kuwaa halal beenta
Kuwaa u habaya
Kan haysta shidaalka
Heehaabka adduunka
Dad maxa kala haysta?
*****
Hareeraa Adduunka
Baqaa ka huraaya
Habaaska daluumay
Dadbaa isku haysta
Haddaad u garsoorto
Runtii helimaysid
Hidii Afrikaanka
Durbaankii Hadlaayey
Halaan-halka ciilka
Codbaa ka hugmaaya
Halyeyada koonfur
Hankooda la quudhay
Hadmaa geeska bari
loo soo hanqaltaagey
Haybtiisaba Aadmi
Dadnimo ka huleelye
Hagardaamo adduunka
Dad maxaa kala haysta!!!.
