Hargeysa, (Hubaal)-Madaxweyne ku-xigeenka Somaliland ayaa lagu eeddeeyay inuu tacadi u geystay Qoys danyar ah oo deris la ah guriga uu degenyahay ee ka Magaalada Hargeysa oo ku yaalla Xaafadda shacabka.
Cabdiraxmaan Cabdilaahi Ismaaciil Saylici oo dhawaan Guri Fooq ah looga dhisay ka soo horjeedka xarunta Dambi baadhista ee Magaalada Hargeysa, ayaa qoys degen meel ku qabsan Guriga uu degenyahay, kaga cawdeen dhibaatooyin xadhig iyo hadidaad isugu jira oo ay ku eedeeyeen inuu kula kacay intii uu guriga cusub u soo guuray.
Qoyskan oo ah maato ay ka masuul tahay, Hooyo haysata ubad yar yar, ayaa waxa dhisme jiingaddo ka samaysani uga dhisanyahay Dhul dacalka Koonfur kaga qabsan Guriga qasriga ah ee Madaxweyne ku-xigeenka, waxaana laba jeer askartiisu xidhay Haweenayda qoyskan ka masuulka ah. “Laba jeer ayuu I xidhay intii uu Guriga soo degay, waxay naga dumiyeen qol Jaajuur ah oo halkan nooga dhisnaa, haddii aanu Albaab is nidhaahno samaysta Maanta sanqadh yar markay maqlaan ayuu odhanayaa naga daaya Garaaca, haddii kale waan ku xidhayaa”sidaasi waxa Warbaahinta u sheegtay Ayaan Juujuule oo ah Hooyada qoyskan ka masuulka ah.
Ayaan oo sii hadlaysa ayaa tidhi “labada jeer ee lay xidhay mar 17 cisho ayaan xidhnaa oo aan wax maxkamad ah lay geynin, marka labaadna Maxkamadda ayaa iga soo daysay, markaa walaahi waxaan kala kulanay Madaxweynehayaga aanu dooranay ee aanu ehelka nahay, ee ubadkayga ay ehelka yihiin, dhibaato aad weyn oo aannu ilaa hada waxba naga odhan”.
Ayaan ayaa sheegtay inaan Madaxweynaha iyo qoyskiisu toona wax magdhow ah ka ka siinin Guriga laga dumiyay oo ahaa qol dhagax iyo dhismeyaal kale oo Jiingad ka samaysan oo iyagana sida ay sheegtay dhawr jeer laga dumiyay. “Waxaana dhacday in markii u horaysay ee lay xidhay goor subax shantii markay ahayd cagaf nalaga geliyay, dabadeed guriga oo dhan la baabiiyay anigana lay xidhay, xataa caruurta waxa iiga guray meesha dadkii jaarka ahaa”ayay tidhi.
Ayaan Juujuule oo uu dhalay Sarkaal ciidanka bilayska Somaliland wakhti dheer ka tirsanaa, isla markaana sheegtay inay dhaawac u ahayd qaliin lagu sameeyay labada jeer ee la xidhay, oo aan kala fogayn siday tilmaantay, ayaa ka warantay sida ay Dhulkan ku degtay iyo waxa isu keenay Madaxweyne ku-xigeenka.
“Dhulkan waxa iska leh aabahay oo ah Sarkaal caan ah oo Bilayska Somaliland ka tirsanaa, waxa siisay dawladda oo ku wareejisay, Madaxweyne ku-xigeenku wuxuu ka iibsaday reer kale oo aannu jaar ahayn ilaa markii aanu soo degnay, kolkaa hadii madaxweynuhu meesha soo degay dee waxay ahayd hadii aanu ogolayn inaanu wada degenaano inuu naga yeelo sidii uu dadkii kale ee Dhulka ka iibiyay uu ka yeelay oo dawladdu na kala rarto, laakiinse dhibaatada joogtada ah ee nalugu hayo may ahayn inuu nagu sameeyo”.
Qoyskani waxay degenyihiin Jiingad ku qabsan Dayrka Aqalka Madaxweyne ku-xigeenka oo wajahaddeeda hore Kolay jaadka lagu iibiyo la dhigay.
Qayb ka mid ah Jiingadu waa Dukaan yar oo sigaarka iyo baddeecadaha kale ee macmacaanka lagu iibiyo.
Madaxweyne ku-xigeenka Somaliland oo ah Masuulka labaad ee waaxda fulinta ee Qaranka, ayaanay noo suurto gelin inaanu helno si aanu cabashadan dhankiisa wax uga waydiino,waxaana xafiiskiisu ku yaala Madaxtooyada sida loo galaa ay marka horeba adagtahay.
Ka sokow qoyskan aaga shacabka ee gurriga madaxweyne ku xigeenka ay ka dhisan-yihiin laba xarumood oo hay’adaha amaanku leeyihiin ayaa baryahan danbe u muuqday aag Milateri. Iyaddoo qof kasta oo aan xog ka ahayne isku daya inuu xataa Jidka lamiga ah ee u dhexeeya gurriga Madaxweyne ku xigeenka iyo xeryahan Kamarad la dhex-mara ay ciidamadaasi Xabsiga dhigaan. Waxaana ugu danbeeyay oo shalay Kamaradii ay siteen xoog lagaga qaaday Laba Wariye oo ka kala tirsan Wargeysyadda Saxafi iyo Himilo.
Xigasho: gobonimonews.
