“Kaalintan Iyo Super Market-Kani Cusub Ee Shirre Company Iyo Hass-Petroleum Ayaa Iska Kaashaday, Ujeeddada Ugu Weyn Ee Aanu Fikradan U Keennayna Waa In Dadkeena La Tuso In Uu Weli Dalkeenu Dihiin Yahay”- Maxamed Xasan Aadan (Shirre), Mulkiilaha Shire Company
Xaflada aad u balaadhan oo xadhiga lagaga jarayay xaruntani ganacsi ee cusub oo lagu qabtay halka laga hirgeliyay oo ku taalla xaafadda shacabka ee Degmada Ibraahim Koodbuur ee magaalada Hargeysa, waxaa ka soo qaybgalay wasiir ku xigeenada wasaaraddaha ganacsiga, kalluumaysiga iyo masuuliyiin kala duwan oo ka tirsan xukumadda Somaliland.
Maxamed Xasan Aadan (Shirre) oo ah Mulkiilaha kaalintan Shiidaalka iyo super market-kani ganacsi ee cusub oo isna xafladaasi xadhiga lagaga jarayay hadal ka jeediyay ayaa faahfaahin ka bixiyay qaybaha ay ka kooban tahay xaruntani ganacsi ee casriga ee uu hirgeliyay, taasi oo uu sheegay in ay isugu jirto qayb dukaamaysi, Kaalin Shiidaal iyo sidoo kale qayb lagu iibiyo qalabka kala duwan ee dayactirka Gaadiidka.
Waxa kale oo uu sheegay Maxamed Xasan Aadan (Shirre) oo ah Mulkiilaha kaalintan Shiidaalka iyo super market-kani ganacsi ee casriga ah in sidoo kale xaruntani laga heli karo qaybta lagu maydho Baabuurta oo casri ah. Waxaanu u mahad naqay dhamaanba dadkii kala duwanaa ee xafladaasi ka soo qayb galay.
Waxaanu yidhi “Kaalintan iyo super market-kani cusub ee Shirre company iyo Hass-Petroleum ayaa iska kaashaday oo wado sameeyay, u jeedada ugu wayna ee aanu fikradan u keenay waa in dadkeena la tuso in uu wali dalkeenu dihiin yahay oo qofkii fikrad keenaaba uu helayo cid maalgelisa. Waxaan u mahadnaqayaa dhamaan madaxda kala duwan iyo marti sharafta ka soo qaybgashay.”
