LABA DUNIDDA UGU XUN: Xusuustii Iyo Qormooyinkii (A.H.N) M.M.Kastam
Qoraa sare ayaa yidhi, laba ayaa dunida ugu xun, suxufiga qalinkiisa iibiya iyo haweenayda jidhkeeda iibisa. Maah maah qiimo leh ayaa iyana tidhaahda,haddaanad garanaynin waa masiibo,haddaad garanaysidna waa masiibo laba jibaaran. Maah maahdaan waxa loo adeegsadaa qofka arrin uu jaahil ka yahay faraha la gala iyo qof shay ama wax aan run iyo xaqiiq cad ku dhisnayn doona inuu dadka wax xaq ah ugu suuradeeyo. Iyada oo iimaan-daradu sideedaba aanay wanaagsanayn, haddana waxayna ku wanaagsanayn in hunguri ga kaga dhacdo iimaan darada sharci-yaqaanka iyo si gaar ah suxufiga iyo suugaan yahanka, oo labadoodaba aan ku wanaagsanayn in ay qalin hunguri noqdaan.
Hadraawi oo arrintaa ka hadlay waxa uu yidhi,
Waxaan saylad gelin weeye
Suugaantu iib maha
Eray iyo sunnee maha
Hunguri iyo sitaad maha
Siddi iyo daya maha
Sallid ugu ducee maha
Ku caleemo saar maha
Sullan reer kucay maha
Garro iyo xajiin maha
Laba qaad ku gado maha
Waxaan saylad gelin weeye
Buso saasaheeda weeye
Marka baadi sooc weeye
Sahan iyo tilmaan weeye
Wax ku saabsan meel weeye.
(Hadraawi).
xigasho: mareegta MM.Kastam
