Gabaygan waxaa layidhaa DIBAD-BAX waxaana curiyey Abwaan: Sacad Axmed Xasan-roodhiile, Musharax (Candidate) Doorashadii Golaha Deegaanka Gobolka Hargeisa sanadka 2012, Ururkii Rays. Gabaygani waa mid mudaharaad ah (dibadbax) wuxuuna dareen adag ka bixinayaa Dilkii Ka dhacay Degmadda axmed dhagax iyo Saylac, musuqmaasuqii iyo boobkii lagu sameeyey Doorashada, ee ay ku kaceen Komishanka Somaliland iyo Maamulka Dawladda Silaanyo oo Isbarkani.
1.Digta gabayga maansada riddada, danab sidii yeedhay
2.Digaandigaha waa laga dhigaa, daalinka u wayne
3.Dam damtiisa waa u qoolan yahay, be,e digtaatoore
4.Dambas kacaya uurada sidii, duufan ku dhirbaaxa
5.Dabayshoo ku dhabanaaniso oo, duulan kugu goobto
6.Dogob ciiray daadkoo sitoo, dulundul caynaaya
7.Dirirtiisi sidii faarax nuur gabay, ku daandaanshay
8.Darandoorigaan ugu dhuftay dab, iyo naabaal dhe
9.Da’yartoo is daba taagan oo, dhagaxu duulaayo
10.Qolqolkoo dadkii is hortubaan, Dibadbax ku hadheeya
11.Askartoo dib guranaysa oo, dhinacyo daymoota
12.Dayrkoo lasoo dhaafo oo, laga dulboodaayo
13.Kacdoonkaa dadwaynahu hurdada, dalaq ku soo gaadhe
14.Damaashaad ciyaar lagu qabsado, daarka kadin-keeda
15.Doog wararac weeyaan dulliga, waan ka dirirnaaye
16.Diiradaydu meel durugsan bay, arag duljoog taaye
17.Hadaan daawo loo helin markale waa la daydayiye
18.waxaan xulad dabka ugalinayaa, shicib dareensiine
19.Deelleey silsilada cusub bal aan ,daah-furkeen sheegno
20.Dareen-kiisi sidii qays miyaan, dunida gaadhsiiyey
21.Sidii Boobe ma u daabacay, ururi deelleeye
22.Diiwaankeeda dhaxal-reeb ibaha, dararsan een maalno
24.Dhako daabcadiisii murtida, dooxday ubacdooda
25.Dayrtuu yar daayee wuxuu ,dacarta leefsiiyo
23.U duqeeyey sidii weedhsame,dalow ka laa laadshay
26.Ilka jiir daruur curatayoo, yurub ka soo daaray
27.Isaguna dubbaha wuu la helay, dakharo gaadhsiiye
28.Dabshidkii tuunisiya sidii, daafaha u gubatay
29.Ama daamihii qaahiraad, dawgii la fadhiistay
30.Daldalkisa saadam xuseen siday, shiicadu u doontay
31.Daalinkii qadaafi sidii, diirku uga hoodhmay
32.Dabaabad wuxuu wadan jiriyo, dirir wixii gaadhay
33.Ayuu gabaygan kuu daaran yahay, waa digniin culuse
34.Golaheeni deegaan habkaan, doobiga u culanay
35.Dadweynaha codkoodii dulmaa, loogu dawgalaye
36.Dawgii xornimo iyo xalaal, laga dawaabeel e
37.Danaystahu ku wacad fure wixii, dan u ahaa qarane
38.Oo Dawladnimadii wacnayd, damiye nuurkeede
39.Distoorkiyo xalaashi kuwaa, doorashada xumeeyey
40.Damacii dadkoodii kuwaa ,daahmadaw saaray
41.Dullinimada musuqmaasuqaa, Daalinku wax boobay
42.Komishanka damiirkooda gaday, diinta ka hayaamay
43.Daayinkood kitaabka u maree, dawga kale qaaday
44.Aakhiraa dab lagu shidi cadaab, dubani saantooda
45.Aduunkana dullay ku arkayaan xilkana, darajo waayaane
46.Dulmanow dhulkaygow wixii, dabin laguu qoolay
47.Dibindaabyadii kugu dhacdee, digasho ooyaysay
48.Waxaa geesi kugu duuganee ,doqon wad kuu reebay
49.Dullinimo qabyaaladi waxay, dib udhac kuu keentay
50.Da, yartii dhulkaygow wixii, damac laguu diiday
51.Waxaad dibad u yaacdiyo waxaad, camal la, aan diiqday
52.Daad-xoor waxaad noqotayoo, badaha doon raacday
53.Soo doogsan waydee wixii, dakhar laguu gaystay
54.Mar uun bay Diraac soo onkodi,doogsin kuu maqane
55.Mar uun baa la daabici wixii, xumo ku daashadaye
56.Mar uun baa la daawayn halkii, damaqa qoonayde
57.Mar uun baa la daah-furi wixii, aragti daahnaaye
58.Mar uun baa dib loo sixi waxay, kala dir sooceene
59.Mar uun baa xaqii kaa dadnaa, daayin soo faqiye
60.Mar uun bay haldoor dhali waxay, ducasho raagtaaye
61.Mar uun bay dayaxa gaadhaysa, dawladnimo adage
62.Afartaasi dabarka u xidhee hadaan, dabac u siidiido
63.Waxba hadalka yaan dib u liqine, doobta soo dhaafye
64.Xaq u dirir xaqsoorow dulmigii, lugo mayeesheene
- Axmed dhagax dhegaankaa dadkii, dhiigod lagu daadshay
66.Tacsibaan u dirayaa hanbada, waa dadkaygiiye
67.Gabood fal dil toogasho maxkamad, lagu dul taagaayo
68.Dacwadana qareen caalamiya loo cuskani, waa danbiilaha e
69.Xasan ciise daliilkuu hayee, nagu dardaaraayey
70.Dawgii runtuu ku adimee, la iska diidaayey
71.Taariikhdu dibay u qori wiixii, laga dulboodsiiyey
72.Daayinkuu ka sugayaa carada, daynta ugu maqane
73.Dardarteedu way soconaysaa, wax is dareensiine
74.Afartaa dareershee hadaan, daanta kale eego
75.Hayinkaynu daadihi nidhaa,daadshay haamaha e
76.Isagaa dalluun dheer ku riday, dumiyey sooyaale
77.Dirqibay kusii yara dhutiyi, daashay maandeeqe
78.Nacnac baa difaac lagu yidhaa, dib u dhacoodiiye
79.Isnaa daadafeeyaa gartii, lagula doodaayey
80.Hadii aan haldoor iman markale, daayacweeyaane
81.Afar kale dareen taagan oon, cidi ka doodaynin
82.Darifkeeda ceebaan dadkaa, saylac guban daadsan
83.Foodkood kuwaa laga duwee, laga dabaalaayey
84.Danaakilo kuwaa laga dhigee, dibinta ruugaaya
85.Dawladaa jabuutina kuwaa, ul iyo diirkeeda
86.Godobtaa dadkaa lagula kacay, waa duruuf adage
87.Deriskaa walaalnimo colaad, looma daahfura e
88.Doorashada markay laalayeen, waa la duudsiyey
89.Ceerigaabo deegaanka gole, duqa laga fogaynaayey
90.Duhurbay badheed dib u cugteen, dadab u meersheene
91.Digdigtii ma shaashay halkay, talo ku daysteen
92.Sool bari walee uguma dudo oo, doorkan la xumeeye
93.Sidii ay diyaar ugu noqdeen, lagu ma daawayne
94.Sanduuqii dushoodii la dhigay, lama daryeelayne
95.Afartaasi kuu daadahshee, waxan ku deeqsiiyey
96.Durdur soo burqanaya murti bal, aan daro xareedi
97.Dulcad guul alla lagu degsaday, ducada awliya e
98.Ayuubkaa dadaale iyana, dibbada loo tuuray
99.Haku daganin maandhaw ayaan, sheekh laguu dirine
100.Ducayeelki weeyaan dabiib, guurtidii qarane
101.Waxba yaan dulxaadine hadaan, diirka ka cadeeyo
102.Dacar-budhuq figtii cumar ku jog, baando ka difaacay
103.Dunbuquu ku liishaamayee, buurtu ku dayaantay
104.Berberay dugsaad tahay darkeed ,cidi kariixayne
105.Shirkagii dan iyo duco midhaha, kaaga soo daatay
106.Mustanbeedka oday dalab siduu, daadka uga moosay
107.Dekedood ku sii xoojisaan, iyo dariswanaageena
108.Dalka oo dhan baa lagu xukumi, doobi xoor wayne
109.Toddob da,aya roobka murtida, daadku mulacyeeye
110.Xiddigaha dariiq lagu maraa, dayax la waayaaye
111.Dulucdeeda maansadu waxay, daadagto oo socoto
112.Dalcad adag waxay fuusho ama, jiifto dabotaxana
- Dariiqeedu kama lumo kolkay, daw ku joogtaaye
- Wargeysyada haloo diriro waxaan, duri xumaan-toode
Abwaan Sacad Axmed Xasan-roodhiile
